គណបក្សក្រៅរដ្ឋាភិបាលមួយចំនួន បានបន្តជំរុញទៅរាជរដ្ឋាភិបាលត្រូវពន្លឿន ក្នុងការស្វែងរកយុត្តិធម៌ពិតសម្រាប់ករណី លោក ជា វិជ្ជា ដែលត្រូវបានឃាតករបាញ់សម្លាប់កាលពី២១ឆ្នាំមុន។
ទីប្រឹក្សាគណបក្សកម្លាំងជាតិ លោក រ៉ុង ឈុន មានប្រសាសន៍ព្រឹកថ្ងៃទី២២ ខែមករា ឆ្នាំ២០២៥ ដែលជាថ្ងៃខួប២១ឆ្នាំនៃការបាញ់សម្លាប់លោក ជា វិជ្ជា ថា មកទល់ពេលនេះ គ្មានឡើយយុត្តិធម៌ពិតប្រាកដសម្រាប់អតីតប្រធានសហជីពសេរីកម្មករនៃព្រះរាជាណាចក្រកម្ពុជារូបនេះ។
លោកនិយាយទៀតថា វាជារឿងគួរឱ្យសោកស្តាយបំផុតសម្រាប់ក្រុមគ្រួសារ សាច់ញាតិ មិត្តភក្តិ និងពលរដ្ឋខ្មែរ ដែលរង់ចាំយុត្តិធម៌ពិត ប៉ុន្តែកន្លងទៅ២១ឆ្នាំហើយ យុត្តិធម៌ពិតនៅតែគ្មានដដែល។
លោក រ៉ុង ឈុង បន្តថា៖ «រហូតដល់ថ្ងៃទី២២ ខែមករា ឆ្នាំ២០២៥នេះ ពន្លឺយុត្តិធម៌នៅតែមិនទាន់ឃើញ នៅកម្ពុជាយើងនេះ ហើយនិទណ្ឌភាពនៅតែកើតមានឡើងនៅកម្ពុជា។ ដូច្នេះក្នុងនាមគណបក្សកម្លាំងជាតិ ក៏ដូចជាក្នុងនាមមិត្តភក្តិលោក ជា វិជ្ជា ក្នុងនាមអតីតប្រធានសមាគម ប្រធានសហភាពសហជីពកម្ពុជា យើងសូមឱ្យរាជរដ្ឋាភិបាលត្រូវតែពន្លឿនក្នុងការវែកមុខ រកឃាតករ និងអ្នកពាក់ព័ន្ធ យកមកផ្តន្ទាទោសទៅតាមផ្លូវច្បាប់។ ក្នុងនាមខ្ញុំ ទោះបីជា២១ឆ្នាំ ឬលើសពីហ្នឹង យើងនៅតែប្រកាន់ជំហរ ស្រែកទាមទាររកយុត្តិធម៌ជូន លោក ជា វិជ្ជា ក៏ដូចជាសាច់ញាតិ ក្រុមគ្រួសារ ក៏ដូចជាសង្គមទាំងមូល ពីព្រោះយើងមិនចង់ឃើញ កម្ពុជាយើង ហើយអ្នកល្បីឈ្មោះរងគ្រោះដោអំពើឃាតកម្មម្តងហើយម្តងទៀត»។
លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានខ្មាន់កាំភ្លើងបាញ់ចំសៀតផ្កា និងដើមទ្រូង ដេកស្លាប់ក្នុងថ្លុកឈាម នាព្រឹកថ្ងៃទី២២ ខែមករា ឆ្នាំ២០០៤ ខណៈលោកកំពុងឈរនៅក្បែរតូបកាសែតមួយ ខាងលិចវត្តលង្កា ក្នុងរាជធានីភ្នំពេញ។
ការបាញ់សម្លាប់លោក ជា វិជ្ជា កើតមានឡើង បន្ទាប់ពីលោកបានទទួលរងការព្រមានសម្លាប់ និងការគំរាមកំហែងពីជនមិនស្គាល់មុខជាបន្តបន្ទាប់ ចំពោះសកម្មភាពសហជីពដ៏សកម្មរបស់លោក ដើម្បីទាមទារអត្ថប្រយោជន៍ជូនដល់កម្មករ រួមមានទាំងការទាមទារដំឡើងប្រាក់ឈ្នួលជូនកម្មករនាពេលនោះផងដែរ។
ប្អូនប្រុសបង្កើតរបស់លោក ជា វិជ្ជា និងបច្ចុប្បន្នជាអនុប្រធានគណបក្សកម្លាំងជាតិ លោក ជា មុន្នី បានថ្លែងប្រាប់ក្រុមអ្នកសារព័ត៌មានមុខរូបសំណាក់របស់បងប្រុសថា មកទល់ពេលនេះគ្មានទេយុត្តិធម៌សម្រាប់បងប្រុសលោក និងក្រុមគ្រួសារជនរងគ្រោះ។ លោកបន្តថា ដោយសារគ្មានយុត្តិធម៌នេះហើយ ទើបពួកលោកតែងនាំគ្នាប្រារព្ធខួបរបស់លោក ជា វិជ្ជា ជារឿងរាល់ឆ្នាំដើម្បីជំរុញទៅរដ្ឋាភិបាលឱ្យរកយុត្តិធម៌ពិតជូនគ្រួសារលោក។
លោកមានប្រសាសន៍ថា៖ «បើមានយុត្តិធម៌យើងចាំបាច់មកធ្វើអីទៀត។ ដោយសារមិនទាន់មានយុត្តិធម៌ហ្នឹងហើយ បានជាយើងតែងធ្វើពិធីដាក់កម្រងផ្កា។ ការដាក់កម្រងផ្កាប្រារព្ធនេះ គឺជាវិញ្ញាសារ មួយបញ្ជាក់ថា ឃាតករ និងអ្នកនៅពីក្រោយខ្នងនៅមានសេរីភាពនៅឡើយ។ អីចឹងជំរុញឱ្យមានការស្វែងរកស៊ើបអង្កេត។ កុំថាឡើយ២១ឆ្នាំ ៣០ឆ្នាំទៀតក៏នៅតែគេជំរុញឱ្យមានការស្វែងរក (ឃាតករ និងអ្នកនៅពីក្រោយខ្នង) ប្រសិនបើមិនព្រមស៊ើបអង្កេតករណីហ្នឹង»។
ពលរដ្ឋអ្នកសារព័ត៌មាននៅមិនទាន់រកការឆ្លើយតបពីប្រធានអ្នកនាំពាក្យរាជរដ្ឋាភិបាល លោក ប៉ែន បូណា បានទេនៅថ្ងៃទី២២ ខែមករានេះ។
ដោយឡែក ប្រធានគណបក្សជំនាន់ថ្មី លោក មាជ សុវណ្ណារ៉ា បានលើកឡើងថា ២១ឆ្នាំហើយ ដែលករណី លោក ជា វិជ្ជា នៅមិនទាន់ទទួលបានយុត្តិធម៌ពិត ហើយ២១ឆ្នាំនេះ គឺជាករណីនិទណ្ឌភាពមួយសម្រាប់កម្ពុជា។
លោកបន្ថែមថា៖ «ងាកមកលោក ជា វិជ្ជា វិញ ឃើញថា២១ឆ្នាំហើយ យើងមិនឃើញថាសមត្ថកិច្ច មិនបានស្វែងរកឃាតករពិត ឬយ៉ាងណា គឺនៅក្នុងអាថ៌កំបាំងនៃការបាញ់សម្លាប់ ថាតើជាហេតុផលគំនុំ ឬហេតុផលនយោបាយ? អាហ្នឹងឱ្យរដ្ឋាភិបាលបង្ហាញទៅព្រោះវា២១ឆ្នាំ វាពីរទសវត្ស ហើយពីរជំនាន់ចាស់មកជំនាន់ថ្មី។ អីចឹងយើងចង់បានយុត្តិធម៌»។
ក្រោយឃាតកម្មលោក ជា វិជ្ជា សមត្ថកិច្ច បានចាប់ជនសង្ស័យពីររូប ឈ្មោះ ប៊ន សំណាង និង សុក សំអឿន យកទៅកាត់ទោសជាប់ពន្ធនាគារ២០ឆ្នាំ តែត្រូវបានតុលាការកំពូលដោះលែងវិញកាលពីឆ្នាំ២០១៣ ក្រោយពេលពួកគេទាំងពីរត្រូវបានឃុំខ្លួនក្នុងពន្ធនាគារជាង៥ឆ្នាំ បន្ទាប់ពីតុលាការរកឃើញថា ពួកគេទាំងពីរគ្មានទោស។
លោក ជា មុន្នី និយាយទៀតថា ដោយសារតែជនសង្ស័យនោះ ជាឃាតករសម្បនិមិត្តទើបលោក និងគ្រួសារបានស្នើទៅតុលាការឱ្យដោះលែងពួកគេទាំងពីរឱ្យមានសេរីភាពវិញ ជៀសវាងឃុំខ្លួនពួកគេទាំងអយុត្តិធម៌ និងប៉ះពាល់ដល់ជីវិតរបស់ពួកគេ។
អ្នកចូលរួមនាព្រឹកថ្ងៃទី២២ ខែមករា ឆ្នាំ២០២៥នេះ ក៏បានអំពាវនាវរកយុត្តិធម៌ចំពោះថ្នាក់ដឹកនំារបស់សហជីពសេរីកម្មករពីរនាក់ផ្សេងទៀត គឺ លោក រស់ សុវណ្ណរ៉េត និង លោក ហ៊ី វុទ្ធី ដែលត្រូវបានសម្លាប់កាលពី ឆ្នាំ ២០០៤ និង ២០០៧ ហើយនៅមិនទាន់បានរកឃើញឃាតករ ដើម្បីផ្តល់យុត្តិធម៌ជូនអ្នកទាំងពីរនៅឡើយ ។
ក្រៅពីនេះ ពួកគេក៏បានលើកឡើងដោយជំរុញឱ្យមានយុត្តិធម៌ពិតលើករណីឃាតកម្មទៅលើបុគ្គលសំខាន់ៗមួយចំនួនទៀត ដូចជាប្រធានអង្គការការពារធនធានធម្មជាតិ លោក ឈុត វុទ្ធី នៅឆ្នាំ២០១២ លោកបណ្ឌិត កែម ឡី នៅឆ្នាំ២០១៦ និងករណីថ្មីៗនេះ គឺឃាតកម្មលើអតីតអ្នកតំណាងរាស្ត្រគណបក្សសង្រ្គោះជាតិ លោក លិម គិមយ៉ា ដែលត្រូវបានឃាតករបាញ់សម្លាប់នៅលើទឹកដីថៃនៅថ្ងៃទី៧ ខែមករា ឆ្នាំ២០២៥៕
………………………………………
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
